2021 оной мартын 17-до Ага нютагаймнай онсо бэлигтэнэй нэгэн, Шэтэ можоhоо hүр харбалгаар түрүүшын СССР-эй тамирай мастер, РСФСР-эй габьяата hоригшо, уласхоорондын классай тамирай мастер, ажалай ветеран Дашинима Норбоевич Норбоевай түрэhөөр 85 жэлэйнь ойн баяр тэмдэглэгдэхэнь.
Мартын 5-да Агын хизаарай Цыбен Жамцараногой нэрэмжэтэ номой сангай нютаг ороноо шэнжэлэлгын таhагай мэргэжэлтэд энэ ойдонь зорюулан, Агын 1-дэхи дунда hургуулиин 8-дахи класста «Хүндэтэ багша, hур харбалгаар hоригшо тухай» гэhэн хэшээл үнгэргэбэ.
Дашинима Норбоев 1936 ондо мартын 17-до Агын аймагай 33 партизанай нэрэмжэтэ колхоздо Норбо Раднаевай гэр бүлэдэ түрэhэн юм. Бага балшар наhаниинь дайнай үедэ дайралдажа, хара багаhаа ажалай амта үзэhэн намтартай.
Дашинима Норбоевич Ага нютагайнгаа, Yбэр-Байгалай хизаарайнгаа, буряад арадайнгаа алдар нэрые суурхуулhан, шандааhаар шанга, эрхимэй эрхим hур харбагшадые бэлдэhэн байна. Тоолобол, 30 гаран СССР-эй болон Россин тамирай мастернууд, 3 уласхоорондын тамирай мастернууд: Лхама Бадмажапова, Мэлс Дабаев, 2012оной Паралимпиин наадануудай абарга мэргэн Тимур Тучинов, «Дружба-1984» уласхоорондын мүрысѳѳнэй, Европын абарга, СССР-эй тамирай габьяата мастер Ханда-Цырен Гомбожапова болонод.
Хүндэтэ Дашинима Норбоевичые 85 жэлэйнь ойн баяраар хани халуунаар амаршалаад,
Харгын утые хэмжэжэ,
Ходол хүнгэн ябагты!
Дабаанай үндэрые дабажа,
Дорюун сарюун ябагты!
Yри хүүгэд, зээнэрээ тойруулан,
Амар жаргал эдлыт даа гэжэ үреэнэбди!
Цыдыпова Ж.Н.,
главный библиотекарь отдела краеведения и библиографии