Россиин габьяата, Буряад республикын арадай артистка, Россиин Федерациин болон Агын Буряадай автономито тойрогой соелой габьяата хүдэлмэрилэгшэ Хажидма Аюржанаева мүнөө жэл 70 жэлэйнгээ ойн баяр тэмдэглэнэ.
Хажидма Аюржанаева 1951 оной хабар Шэтэ можын Агын тойрогой Могойтын аймагай Ага-Ханглил нютагта түрэhэн намтартай. 1971 ондо Улаан-Удын П.И.Чайковскиин нэрэмжэтэ хүгжэмэй училищи «домрын» классаар ород арадай инструментнүүдэй таhагые дүүргээд, Буряадай гүрэнэй филармонидо хүдэлхөөр эльгээгдэжэ дуу, хатарай «Байгал» ансамблиин оркестртэ оруулагдаа hэн.
Оркестртэ хүдэлхэ үедөө Хажидма Аюржанаева дуугаар hонирхожо, Россиин арадай артистка Чимита Шнюшкинаhаа дуунай хэшээл абаhан юм. Чимита Григорьевна бэлигтэй бэрхэ шабитаяа абьяас ехэтэйгээр ажаллажа, мэргэжэл шадабарииень мүлиhэн байгаа.
1977 ондо тэрэ Буряадай гүрэнэй телерадиокомпаниин Чингис Павловай нэрэмжэтэ буряад арадай инструментнүүдэй оркестртэ хүдэлжэ эхилбэ. Тэрэнэй гүйсэдхэhэн олохон зохеолнууд радио, телевидениин алтан жасада оронхой. Хажидма Аюржанаева шэнхинүүр hайхан хоолойтой, гүйсэдхэhэн дуугаа бүхы сэдьхэлhээ гаргажа шададаг, ажалша бүхэриг дуушан юм.
Хажидма Аюржанаева 1973 ондо Москва, Свердловск хотонуудта, 1987 ондо Новосибирскэ можодо, 1993 ондо Украинада үнгэргэгдэhэн Буряадай Экономико болон соелой удэрнүүдтэ хабаадаhан юм. Зүүн зүгэй арадуудай хатар нааданай «Бадма сэсэг» ансамблиин бүридэлдэ орожо, 1986 ондо Франци ошоhон байгаа. 1987 ондо Буряадай АССР-эй зохеохы бүлэгэй бүридэлдэ орожо, Японой Саппоро хотодо нээгдэhэн «Совет Буряад орон» гэhэн выставкын концертнүүдтэ амжалтатайгаар хабаадаа hэн. 1991 ондо Голландида болоhон арадай уран бэлигэй фестивальда хабаадаа. Тэрэ арадай уран бэлигэй Бүхэсоюзна I фестивалиин, арадай инструментнүүд дээрэ наадагшадай, арадай дуунай Бүхэроссиин II харалга-конкурсын лауреат болоо.
Буряад үндэhэн соел, искусстваяа хүгжөөлгэдэ ехэ хубитаяа оруулhанайнгаа түлөө Хажидма Аюржанаева «Буряадай АССР-эй габьяата артистын», «Буряад Республикын арадай артистын» хүндэтэ нэрэ зэргэнүүдтэ хүртэhэн, 1996 ондо Буряад Республикын Гүрэнэй шангай лауреат болоhон, 2001 ондо «Агын Буряадай автономито тойрогой соелой габьяата хүдэлмэрилэгшэ» 2002 ондо «Россиин габьяата артист» гэhэн үндэр нэрэ зэргэнүүдтэ тэрэнэй алдар солые дэнзэлhэн байгаа.
Тэрэнэй зохеохы бүхы ажал ябуулга гансал буряад бэшэ, харин Россиин болон хариин оронуудай арадуудай хүгжэм дуунуудые эдэбхитэйгээр дэлгэрүүлдэг буряад арадай инструментнүүдэй оркестрэй түрэл коллективтэеэ нягта харилсаа холбоотой юм. Мүөө наhанай амаралтада гараhан.
Уншалгын таhагые даагша
Цыцыгма Цыриторова бэлдэбэ.