- Информация о материале
- Просмотров: 520
Уласхоорондын буряадай үндэhэтэнэй 13-дахи «Алтаргана» наадан Эрхүүгэй можодо эмхидхэгдээ. Бүхыдөө 4,5 мянган хүн «Алтарганада» хабаадаа, харин мүрысөөнүүдтэ хоер мянга гаран хабаадагшад тоологдоо. Энэ удаа нааданда уран hайханай 14, тамирай 6 мүрысөөн үнгэрөө.
- Информация о материале
- Просмотров: 550
Алтаргана-2012
Буряад болон Яхад республикануудhаа, Эрхүүгэй можоhоо, Москва, Санкт-Петербург, Новосибирск, Томск, Красноярск хотонуудhаа, Үбэр Байгалай хизаарай аймагуудhаа, Казахстан, Хитад, Монгол гүрэнүүдhээ – хамтадаа 89 диаспорын түлөөлэгшэд бүгэдэ буряад угсаатан арадай 10-дахи «Алтаргана» ехэ нааданда хабаадалсахаа, Ага нютаг буужа ерэhэн байна.
«Буряадай нэгэ үдэр» гэhэн арадай аман зохеолой бүлгэмүүдэй харалга-мүрысөөндэ хамта 21 бүлгэм хабаадаа. Хоер үдэр үргэлжэлhэн харалга мүрысөөнэй дүнгөөр, фестивалиин Гран-При шанда Могойтын аймагай «Нютагай магтаал» гэhэн бүлгэм хүртөө. Алтан медаляар – Агын аймагай «Сэргэ», мүнгэн медаляар – Шэнэхээн нютагай «Тоонто», хүлэр медаляар – Эрхүүгэй можын «Далайн долгин» гэhэн аман зохеолой бүлгэмүүд шагнагдаа.
Бүлгэм бүхэн олон зуун жэлнүүдтэ мүлигдэжэ ерэhэн буряад арадайнгаа еhо заншалнуудые, гүнзэгы сэсэн удхатай hургаануудые зүжэглэн наадажа харуулаа, үреэлэй hайхан үгэнүүдые, таабари, оньhон үгэнүүдые тодо хурсаар түүрээгөө. Арадайнгаа уянгата дуунуудые дуулажа, еохор хатаржа, баярлан хүхилдэжэ, еhото найр нааданай түүдэгэй гал бадараагаа юм.
- Информация о материале
- Просмотров: 652
Бүгэдэ буряад угсаатан арадые нэгэдүүлhэн «Алтаргана» гэhэн уласхоорондын фестиваль 8-дахияа Ангарай эрьедэ 2008 оной июлиин 5-8-ай үдэрнүүдтэ нэрьебэ. Эрхүүгэй можодо турүүшынхиеэ үнгэрhэн нааданда Үбэр Байгалай хизаарай, Буряад республикын, Эрхүүгэй можын, Москва, Санкт-Петербург, Новосибирск, Красноярск, Томск хотонуудай, Саха-Яхадай, Монголой, Хитадай, Франциин, Казахстан, Америка, Великобританиин түлөөлэгшэд, бүхыдөө гурба хахад мянга гаран хабаадагшад ба айлшад сугларба. Ангарск, Эрхүү, Шелехов хотонуудай, Усть-Орда тосхоной, Черемушки нютагай талмайнууд дээрэ уран hайханай харалганууд үнгэрөө. Тамирай мүрысөөндэ заншалта болоhон эрын гурбан наадануудай хажуугаар, 2008 оной «Алтаргана» фестивалиин программада буряад шатарай мүрысөөн оруулагдаа.
- Информация о материале
- Просмотров: 795
Бүгэдэ буряад угсаатан арадай «Алтаргана» уласхоорондын фестиваль 6-дахияа Монгол ороной Дорнод аймагай ниислэл болохо, Чойбалсан хотодо үнгэргэгдөө.
2002 ондо Агын Буряадай тойрогой дэбисхэр дээрэ үнгэргэдэhэн «Алтаргана» шанар шэнжээрээ, эмхидхэлэйнгээ талаар нилээд дээдын хэмжээндэ хүргэгдэhэн байгаа. Шэнэ шатада ороhон «Алтарганые» энэл хэмжээндэнь 2004 ондо хаана үнгэргэхэб гэhэн асуудал ехэ хурсаар табигдаhан байна. Монгол ороной Дорнод аймагай губернатор Одбаяр Чойбалсан хотодо эмхидхэхые дурадхаhан байгаа. Тиигэжэ «Алтарганын» туг тус аймагайхидта дамжуулагдажа, июлиин 23-25-ай үдэрнүүдтэ түсэбэйнгөө еhоор, бүгэдэ буряадай наадан Чойбалсанда үнгэргэдэбэ гээшэ.
Фестивальда Россиин Федерациин буряад угсаатан арадай hуурижаhан 3 субъектнүүдэй, Хитадай Дотор Монголой Мүнгэн, Алтан, Эвенкиин hомонуудай, Монголой 8 аймагуудай, Улаан-Баатарай түлөөлэгшэд сугларба. Буряад угсаатанай ехэ найр наадан эмхидхэлэй үндэр хэмжээндэ үнгэргэгдөө гээд тэмдэглэлтэй.
- Информация о материале
- Просмотров: 895
Монгол hайхан орондо буряад арадай дуунуудай харалган гээд бии болоhон «Алтаргана» hайндэр 2002 онhоо хилэ дабажа, уласхоорондын хэмжээндэ гараба. Энэ хэрэгтэ Агын Буряадай автономито тойрогой захиргаанай толгойлогшо ябаhан Баир Баясхаланович Жамсуевай аша үрэ сэгнэшэгүй. Тиигэжэ 3 гүрэнүүд дээрэ - Россида, Монголдо ба Хитадта ажаhуудаг буряад угсаатан арадые нэгэдүүлhэн «Алтаргана» ехэ наадан Ага найман эсэгын hуурижаhан аглаг hайхан талада анха түрүүшынхеэ тугаа намилзуулба. Хитадай Шэнэхээнэй буряадууд, Усть-Ордын автономито тойрогой түлөөлэгшэд, Буряад республикын ба Монголой аймагуудай, Москва хотоhоо, Агын тойрогhоо гадуур ажаhуудаг буряад яhатан заншалта мүрысөөнүүдтэ хабаадахын хажуугаар, бэе бэетэеэ дүтөөр танилсаа, түрэл гаралтаяа уулзаа, хани барисаагаа бүхэжүүлөө.
Монголой Дадал hомондо анхан байгуулагдахадаа, гансал буряад арадай дуунуудай харалган гээд эмхидхэгдэдэг hаа, удаадахи жэлнүүдтэ эстрадна дуунай, үльгэр домогуудые түүрээгшэдэй конкурснууд оруулагдаа. Зүгөөр уласхоорондын хэмжээнэй боложо, «Алтаргана» нааданай программада эгээ түрүүшынхеэ арадай үндэhэн хубсаhанай,арадай аман зохеолой бүлгэмүүдэй, уран гартанай конкурснууд эмхидхэгдэдэг болобо.
2000 ондо Монголой Дашбалбар hомондо үнгэргэгдэhэн нааданда фестивалиин hүлдэ тэмдэг болохо хухэ номин үнгэтэй тугынь Агын тойрогой түлөөлэгшэдтэ барюулагдаhан байгаа. Тиигэжэ 2 жэлэй унгэрhэн хойно уласхоорондын хэмжээнэй эгээ түрүүшын фестиваль аглаг hайхан Ага нютагта эхилбэ. Һайндэрэй үглөөнhөө эхилжэ, Ага тосхон дээрэ хэдэн шэнэ байшангууд баяр еhололой оршон байдалда үүдээ сэлибэ. Агын тойрогой гимназиин хоер дабхартай шэнэ байшан, Ага тосхоной хойто бэедэ оршодог «Родничок» гэhэн хүүгэдэй сэсэрлиг, Согшон дуганай hэльбэгдэhэн байшан нээгдэбэ.
