2021 оной июниин 24-26-ай үдэрнүүдтэ Агын тойрогой ажаhуугшад бүгэдэ буряад угсаатан арадые угтан абаха. Мүнөөдэрэй талада уласхоорондын хэмжээнэй ехэ нааданда бэлдэлгын горитойхон ажалнууд ябуулагдаhаар. Үбэр Байгалай хизаарай Цыбен Жамцараногой нэрэмжэтэ номой сан «Алтаргана» фестивалиин шугамаар үнгэрхэ номуудай конкурсда шэлэлгын шатын мүрысөө соносхобо. Конкурсда хабаадаха номууд 2018 оной августhаа 2020 оной ноябрь болотор хэблэгдэhэн, ISBN-тэй байха еhотой гэhэн эрилтэнүүдтэй. Нэгэ автор хэдышье номинацида номоо зууршалха аргатай. Зүгөөр дахяад шэнэлэгдэн хэблэгдэhэн номууд конкурсда хабаадахагүй.